Sunday, August 13, 2006

lakwatsa

Hay kinabuhi!

Mibangon ko alas 4:00 sa kadlawon. lami pa unta muhinanok apan pugos nga gi-alsa ang kaugalingon kabug-at ug midulong sa banyo aron maligo.

Sakto, alas 4:30, presko na ug gaan na ibuka ang mga mata. Mibaktas gamay pagawas sa eskina ug misakay sa sikad. Dayon mitung-tong sa jeep ug wala madugay, anaa na ako sa terminal. Gipangita ang bus nga padulong Malaybalay City Bukidnon.

Ang tumong: musimba didto sa Monasteryo sa Benedictine o Monastery of the Transfiguration. Apan ang pinaka-tumong: muambit sa binulan nga Brunch with the Monks!
sa laktod nga pagka-istorya, mangumbira. Kini kinabuhi!

Pagkahuman sa katapusan nga pangaliya, ug una miduko ang pari atubangan sa altar, ang akong huna-huna gimanduan sa akong gakutoy nga tiyan:
gihikap ang agtang: ug sa kahilom miingon, HUNA-HUNAA
gibutang ang tuong kamot ubos sa tiyan: ug sa kahilom gihapon miingon: ANG IMONG TIYAN
ug gitapik ang manag-pikas nga abaga: GAMITA ang imong DUHA ka KAMOT
dayon gihalukan ang tuo nga mga tudlo: ug miingon, KAY IKAW GIGUTOM! Amen! : )

Humba nga gasinaw-sinaw, nilagpad nga piniritong isda nga adunay sacue! , de color nga kan-on nga gitawag man siguro kadto'g Java rice : ), piniritong manok, init nga kape ug saging!

Pastilan Budoy! Wa' gyud ka makatilaw Budoy! kay kung naa pay sikwate'd bulad unta, magsadya gyud ang akong kasing-kasing sa pagsinggit sa langitnong himaya!

Apan ang nagpalami gayud sa maong pani-mahaw (pani-udto'g pamahaw) mao ang higayon nga uban ang mga suod nga mga higala.

Katawa ginagmay, dayon hungit dinaghan!
Walay makatupong sa kanindot sa pahiyom nga gidungagan sa nagsinaw nga ngabil!
Higop-higop dayon ug brewed coffee, pastilan! labaw pa sa konsehal!
Pagka-lami sa paminsar!

Pag-kalami gyud baya muhigop ang kape inubanan sa mabugnaw nga huyuhoy sa hangin!
Kung ana-a ka lang unta Budoy! Nakatilaw na gyud unta ka!
Maka-siyagit ka gyud: dis is layp!

Apan kay ang matag higayon, aduna man gayu'y katapusan,
Akong gitapos ang maong okasyon sa usa ka pamalandong...

Brewed kofi, great prends, good fud, mahinuklugong pagsimba...

Ang duha ka oras nga byahe sa bus, murag perti rang dali-a!

Mga higala, kung makahigayon kamo,
Duyug kanamo. Kada ika-duhang Dominggo sa Bulan.
Brunch with the Monks.
Monastery of the Transfiguration.
Malaybalay City.

Makurat ka. Naay taga-Ozamis, Iligan City ug bisan Tagum City.
Ngil-ngig gyud!

Murag sunod, suwayan ku:
Mamahaw sa Bukidnon ug Manihapon sa Zamboanga. Mahimo kaha?

Unsa man Budoy? Mutilaw ka o dili?

:)

Tuesday, May 10, 2005

Sa atong pagbaktas baktas,
makasugat ta ug bisan unsa lang.
Usahay, bato nga makapandol,
lungag nga makabulasot,
o panit sa saging nga maka dalin-as.
Usahay, landong. Usahay init.

Apan, kasagaran,
sa imong pagbaklay-baklay,
daghan usab nga butang ang imong masaksihan.
Nagkadaiyang mga dagway sa tao, sa palibot.
Sama sa nawong nga nag-mug-ot,
Dagway nga mapahiyumon,
Naay Tawo nga isnabero,
ug uban pa.

Anaa usab mga talan-awon nga sakit sa mata.
Sama sa basura nga gikatag sa iro,
Dalan nga lapokon,
jeep nga itom ug aso!
ug tawo nga mangihi bisan asa!

Apan ang mas maanindot sa pagbaklay-baklay,
mao ang kamatuoran,
nga sa matag tikang,
kita adunay kapa-ingnan,
ug ang matag tunob,
magbilin ug timailhan, (gawas kung sementado and dalan :o)
Nga kita miagi na nianang lugara,
ug mupadayon sa pagtikang,
hangtud muabot sa gitinguha sa matag tunob:

ANG KALIPAY NGA GAHULAT SA TUMOY SA MATAG DALAN.

Sa pagbaklay-baktas sa kinabuhi,
Panington ta ug usahay ug bugnaw.
Kasagaran, igang. Init.
Usahay pud mahumod ta sa ulan.


Basta padayon lang kita Higala.
Kay aduna usab kahayahay,
Gikan sa hoyoyoy sa Hangin,
Ug sa panganod nga magtabon,
sa init ni Haring Adlaw.

Kung ikaw kapuyon,
Hunong lang kadyot,
Ug pasilong ilawom,
sa Punuan ni Higalang Kahoy.






Wednesday, September 29, 2004

mitamurposis

Hataas na nga higayon,
naghandum nga
ang matag duga
sa talagsa-ong
hiyas,

mu-ikyas gawas
sa pagkumkom.

ug karon...

kagawasan!
sa pagbati
nga dugay nang
nag-antus,
bo-ut musabwag
sa panganduyng
dugay nang nagdila-ab!

kadaugan!
alang sa kasing-kasing
nga naghandum
makab-ot
ang tiunay
nga Kalipay!

Diha-diha,
ako nahimong Ako!


Usahay

usahay...
panagsa...
tagsa-tagsa...

kaniadto,
karon,
puhon!

hinay-hinay...
sa kalipay.

sa pangandoy,
naningkamot.

kinabuhi,
Nindot!